उद्धवा, अजब तुझे सरकार; राजू शेट्टींची ठाकरे सरकारवर टीका

उद्धवा, अजब तुझे सरकार; राजू शेट्टींची ठाकरे सरकारवर टीका

पुणे: मोर्चामध्ये गायीचा छळ झाला म्हणून माझ्यावर गुन्हा दाखल करता मग दूध उत्पादक शेतकऱ्याने आत्महत्या केल्याप्रकरणी दुग्धविकास मंत्र्यांवर सदोष मनुष्यवधाचा गुन्हा दाखल का करत नाही?, असा सवाल करतानाच उद्धवा, अजब तुझे सरकार, असं म्हणत स्वाभिमानी शेतकरी संघटनेचे नेते, माजी खासदार यांनी ठाकरे सरकारवर टीका केली आहे. राजू शेट्टी यांनी ट्विटरवर एक व्हिडिओ अपलोड करून त्यांची प्रतिक्रिया व्यक्त केली आहे. राज्यातील दूध उत्पादक शेतकरी गेल्या दोन-अडीच महिन्यांपासून उत्पादन खर्चापेक्षा कमी खर्चात दूध विकतोय. त्यावेळी कुणाला दया आली नाही. दूधाचा धंदा परवडत नाही म्हणून दूध उत्पादक शेतकऱ्यांनी आत्महत्या केल्या. राहुरीच्या रेवनाथ काळे या शेतकऱ्यानेही दूधाला भाव नसल्याने आत्महत्या केली. गायीचा छळ केल्यामुळे माझ्यावर गुन्हा दाखल करणारे सरकार शेतकऱ्याने आत्महत्या केली म्हणून त्याला जबाबदार असणाऱ्या दूग्धविकास मंत्र्यावर गुन्हा दाखल कधी करणार?, असा सवाल राजू शेट्टी यांनी केला आहे. माझ्यासह माझ्या कार्यकर्त्यांवर गुन्हा दाखल करणाऱ्या पोलिसांना दूग्धवविकास मंत्र्यावर गुन्हा दाखल करावीशी का वाटत नाही? दूग्धविकास मंत्र्यावरही सदोष मनुष्यवधाचा गुन्हा दाखल झाला पाहिजे. परवानगी न घेता मोर्चा काढला म्हणून आमच्यावर गुन्हा दाखल होत असेल तर हा गुन्हा आम्ही वारंवार करणार. पोलिसांना जे काही करायचं असेल ते त्यांनी करावं. पण दूध उत्पादक शेतकऱ्यांसाठी आम्ही गप्प बसणार नाही. जोपर्यंत दूध उत्पादक शेतकऱ्यांना न्याय मिळत नाही, तोपर्यंत पुन्हा पुन्हा आंदोलन करतच राहू, असा इशाराही शेट्टी यांनी दिला आहे. दरम्यान, विनापरवनगी मोर्चा काढून गायींना ओढत नेऊन त्यांचा छळ केल्याप्रकरणी राजू शेट्टींसह स्वाभिमानी शेतकरी संघटनेच्या ५० कार्यकर्त्यांवर बारामतीत गुन्हे दाखल करण्यात आले होते. स्वत: पोलीस अधिकाऱ्याच्या फिर्यादीवरून हे गुन्हे दाखल करण्यात आले आहेत. त्यामुळे राजू शेट्टी संतापले असून त्यांनी सरकारचे वाभाडे काढताना उद्ववा, अजब तुझे सरकार म्हणत सरकारवर टीका केली आहे. माजी खासदार राजू शेट्टी, अमरसिंह कदम (रा. हिंगणेवाडी, ता. इंदापूर), विलास विनायक सस्ते (रा. खांडज, ता. बारामती), महेंद्र जयसिंग तावरे (रा. सांगवी, ता. बारामती), विकास उर्फ नानजी बाबर (रा. पिंपळी, ता. बारामती), धनंजय महामुलकर (रा. फलटण, जि. सातारा), सचिन खानविलकर (रा. नामवैभव टॉकिजशेजारी, फलटण, जि. सातारा), डॉ. राजेंद्र घाडगे (रा. चौधरवाडी, ता. फलटण), बाळासो शिपकुले, सिवाजी सोडमिसे (दोघे रा. सोमंथळी, ता. फलटण), राजाभाऊ कदम (रा. दौंड शुगर कारखान्याजवळ, ता. दौड), बुधम मशक शेख (रा. सणसर, ता. इंदापूर) व अन्य ४० ते ५० स्वाभिमानीचे कार्यकर्ते यांचा गुन्हा दाखल झालेल्यांमध्ये समावेश आहे. त्यांच्या विरोधात भारतीय दंडविधान कलम १४३,१४५,१४९,१८८,३४१,२६९,२७० सह साथीचे रोग प्रतिबंध अधिनयम, प्राण्यांचे अत्याचारापासून संरक्षण अधिनियम कायद्यानुसार गुन्हा दाखल करण्यात आला आहे.